ghar to donon pas hain lekin mulaqaten kahan

ghar to donoñ paas haiñ lekin mulāqāteñ kahāñ

āmad-o-raft aadmī kī hai pe vo bāteñ kahāñ

ham faqīroñ kī taraf bhī to nigāheñ dam-ba-dam

pheñkte jaate the aap aage vo ḳhairāteñ kahāñ

ba.ad marne ke mere hogī mere rone kī qadr

tab kahā kījiyegā logoñ se vo barsāteñ kahāñ

yuuñ to hai din raat mere dil meñ us kā hī ḳhayāl

jin dinoñ apnī baġhal meñ thā so vo rāteñ kahāñ

jis tarah se kheltā hai vo diloñ kā yaañ shikār

'dard' aatī haiñ kisī dilbar ko vo ghāteñ kahāñ

ghar to donon pas hain lekin mulaqaten kahan

aamad-o-raft aadmi ki hai pe wo baaten kahan

hum faqiron ki taraf bhi to nigahen dam-ba-dam

phenkte jate the aap aage wo KHairaaten kahan

baad marne ke mere hogi mere rone ki qadr

tab kaha kijiyega logon se wo barsaten kahan

yun to hai din raat mere dil mein us ka hi KHayal

jin dinon apni baghal mein tha so wo raaten kahan

jis tarah se khelta hai wo dilon ka yan shikar

'dard' aati hain kisi dilbar ko wo ghaten kahan