جلے گا دل تری فرقت میں تو دھواں ہو گا

جلے گا دل تری فرقت میں تو دھواں ہو گا

چھپا ہوا ہے جو غم خود بخود عیاں ہو گا

ہنسے گا سارا زمانہ شکستہ حالی پر

بغیر درد کے کوئی نہ مہرباں ہو گا

نوازشوں نے تری دل کو کردیا روشن

کسے خبر تھی کہ بجلی پہ آشیاں ہو گا

تری نگاہِ کرم ڈھونڈیں گی مری نظریں

ہجوم حشر میں جب شور الاماں ہو گا

گلہ نہ کرنا خبر دار اے دلِ ناداں

وفا کے نام پہ جب تیرا امتحاں ہو گا

یہ دل نہیں ہے حقیقت میں ایک نکتہ ہے

خریدے گا وہی جو اس کا قدر داں ہو گا

یہ معرفت کی بلندی ہے حضرتِ خواجہؔ

کہیں گے راز اسے جو کہ قدر داں ہوگا