ہے عجب نقشہ بت مغرور کا

ہے عجب نقشہ بت مغرور کا

حور کی تصویر جلوہ نور کا

بند کیں آنکھیں تو دیکھا آپ کو

گوشۂ دل میں ہے جلوہ طور کا

ناز اٹھاتا ہوں مجھے بوسہ ملے

دل ذرا تو خوش کرو مزدور کا

سایۂ گیسو میں ہے دیوانہ دل

طول ہے قصہ شب دیجور کا

دل کی عینک سے نظر آتا ہے عرش

میں تماشہ دیکھتا ہوں دور کا

ہر گھڑی منبر پہ توصیف بہشت

عشق واعظ کو ہے پنہاں حور کا

سینہ بریاں چشم گریاں بیقرار

حال ہے یہ واقفؔ رنجور کا