اس طرح تھرائے ہم اپنا ہی ارماں دیکھ کر

اس طرح تھرائے ہم اپنا ہی ارماں دیکھ کر

جس طرح کانپے کوئی خواب پریشاں دیکھ کر

بلبلوں کو کیا سنائیں داستانِ شامِ غم

رحم آتا ہے رخِ صبحِ بہاراں دیکھ کر

دل میں اب تیری تجلی کے سوا کچھ بھی نہیں

سب کو بھولے ہم تجھے اے ماہِ تاباں دیکھ کر

آئی سلجھانے کی خاطر رحمتِ شانہ نما

گیسوئے تقدیرِ انساں کو پریشاں دیکھ کر

دل نے پائی ہے ادائے لرزشِ پیہم حبیبؔ

آئینہ حیران ہے اب مجھ کو حیراں دیکھ کر