دوئی دور کر کے جو ہم دیکھتے ہیں

دوئی دور کر کے جو ہم دیکھتے ہیں

تو ہی ایک دیر و حرم دیکھتے ہیں

یہ کچھ کفر اٹھا ہے دل میں ہمارے

کہ کعبہ میں بیٹھا صنم دیکھتے ہیں

خدا کے کرم سے سمجھتے ہیں بہتر

صنم تجھ سے جو ہم ستم دیکھتے ہیں

کسی کو نہیں دیکھتے ہم جہاں میں

اسی کو خدا کی قسم دیکھتے ہیں

جنہیں دو گھڑی وصل ہوتا ہے حاصل

وہ اک عمر ہجراں کے غم دیکھتے ہیں

سر ان کا دو عالم سے گزرے ہے پیارے

جو اک بار تیرے قدم دیکھتے ہیں

خدا دشمنوں کو نہ دکھلائے غمگیںؔ

جو کچھ دوست اپنے سے ہم دیکھتے ہیں