فغاں کے ساتھ لب تک دم بدم آنے سے کیا حاصل

فغاں کے ساتھ لب تک دم بدم آنے سے کیا حاصل

دل مضطر کو سمجھا دو کہ گھبرانے سے کیا حاصل

جو پیشانی کا لکھا ہے وہ پیش آنا ضروری ہے

تو پھر تقدیر کی باتوں پہ غم کھانے سے کیا حاصل

نصیحت ہم سے دیوانے کہیں سن کر سنبھلتے ہیں

کوئی ناصح کو سمجھا دے کہ سمجھانے سے کیا حاصل

جو مرنا ہے تو ہم بھی مر مٹیں گے کوئے جاناں میں

کسی جنگل میں جا کے سر کو ٹکرانے سے کیا حاصل

ہماری جاں نثاری بھی کسی دن آزما دیکھو

یہ قصے لیلیٰ و مجنوں کے پڑھوانے سے کیا حاصل

نگاہ مست ساقی سے ہے بزم مے کی کیفیت

ہمیں پھر ساغر و مینا و میخانے سے کیا حاصل