تپ غم سے مری حالت ہے ابتر دیکھیے جاؤ

تپ غم سے مری حالت ہے ابتر دیکھیے جاؤ

ذرا حال دل بیتاب و مضطر دیکھتے جاؤ

صبا نے کاکل مشکیں کو چھیڑا دوستو لیکن

خفا ہوتا ہے مجھ پر وہ ستم گر دیکھتے جاؤ

تمہارے روئے آتشناک کی گرمی سے گلشن میں

پسینے میں ہے ڈوبا ہر گل تر دیکھتے جاؤ

کمر بستہ ترے آگے گھڑے ہیں اے مہ خوبی

گلستاں میں گل و سر و صنوبر دیکھتے جاؤ

ڈبو دیں گے جہاں کو ایک دم میں اپنی موجوں سے

ہے طغیانی پہ بحر دیدۂ تر دیکھتے جاؤ

غلط فہمی ہے لوگوں کی جو کہتے ہیں ہلال اس کو

تمہارا ناخن پا ہے فلک پردیکھتے جاؤ

نہیں اے ہمد مو واقف ہیں وہ سوز محبت سے

جگر جل کر ہوا یاں مثل اخگر دیکھتے جاؤ

ہزاروں خطرے ہیں اے ہمصفیر و راہ الفت میں

ہے ہر ہر گام پر یاں تیغ و خنجر دیکھتے جاؤ

مسیحا ہو کے نفرت کرتے ہو بیمارؔ الفت سے

کوئی دم کا ہے مہماں اس کو دم بھر دیکھتے جاؤ