بھلا قدر نگاہ ناز جاناں کون سمجھے گا

بھلا قدر نگاہ ناز جاناں کون سمجھے گا

اسی کو باعث تسکین ایماں کون سمجھے گا

بہت سے ہیں یہاں پر خون حسرت دیکھنے والے

مرے دل کو چراغ راہ عرفاں کون سمجھے گا

یہی دو چار ہیں جن کو محبت نے نوازا ہے

جفائے دوست کو دنیا میں احساں کون سمجھے گا

یہاں خواب سبک کے دیکھنے والے ہی بستے ہیں

جہاں میں معنئ خواب پریشاں کون سمجھے گا

بہار آتے ہی اے دست جنوں تو نے غضب ڈھایا

کہ میں پرزے ہی پرزے ان کو داماں کون سمجھے گا

جو میرے دل سے کھنچ کر آنکھ تک آیا ہے اک آنسو

خدا جانے کہ اس قطرہ کو طوفاں کون سمجھے گا

بجز ساقی کے اے بہزادؔ ناواقف ہے کل عالم

میرے اشکوں کو بھی مستی کا عنواں کون سمجھے گا