جہاں تک ہو سکے صبر و توکل سے اوقات بسر کر اور غیر سے التجا کا اندیشہ سر سے دور کر۔

ہمیشہ مراقبہ کرنے سے نسبتِ باطن میں قوت پیدا ہوتی ہے اور کثرتِ درود سے واقعات نیک نظر آتے ہیں اور کثرتِ نوافل سے انکسار و شکستِ دلی حاصل ہوتی ہے اور کثرتِ تلاوت سے نور و صفائی ہوتی ہے۔

فقیر نے روزہ رکھا ہے کہ امیروں سے نیاز نہ قبول کروں گا، آفتاب قریب غروب کے ہے اگر اپنا روزہ توڑوں دس لاکھ روپیہ چاہیے کہ ہمسایہ کی عورتوں کا چولہا گرم ہو۔

محبتِ اہلِ بیت اور تعظیمِ اصحابِ کبار برابر ضروری ہے اور یہی راہ مستقیم ہے کہ جو قیامت کے روز بہ صورتِ پل صراط ظاہر ہوگی، جس میں یہاں کجی نہ ہوگی وہ صراطِ مستقیم سے باستقامت گزرے گا اور جس میں کجی ہوگی اس کو وہاں مصیبت ہوگی۔