माता सूं हरि सौ गुना जिन से सौ गुरूदेव ।

प्यार करैं औगुन हरैं चरनदास सुकदेव ।।

सतगुरू शब्दी सेल है सहै धमूका साध ।

कायर ऊपर जो चलै तौ जावै बरबाद ।।

जब सतगुरू किरपा करैं खोलि दिखावैं नैन ।

जग झूठा दीखन लगै देह परे की सैन ।।

गुरू के आगे जाय करि ऐसे बोलै बोल ।

कछू कपट राखै नहीं अरज करै मन खोल ।।

दया होय गुरूदेव की भजै मान अरू मैन ।

भोग वासना सब छुटै पावै अति ही चैन ।।

दृष्टि पड़ै गुरूदेव की देखत करें निहाल ।

औरैं मति पलटैं तवै कागा होत मराल ।।

इन्द्री मन के बस करै मन करै बुधि के संग ।

बुधि राखै हरि पद जहां लागै ध्यान अभंग ।।

पितु सूं माता सौगुना सुत को राखै प्यार ।

मन सेती सेवन करै तन सूं डांट उरू गार ।।

अपना करि सेवन करैं तीन भांति गुर देव ।

पंजा पच्छी कुंज मन कछुवा दृष्टि जु भेव ।।

ऐसी मारी खैंच कर लगी वार गइ पार ।

जिनका आपा ना रहा भये रूप ततसार ।।

सतगुरू के मारे मुए बहुरि न उपजै आय ।

चौरासी बंधन छुटैं हरिपद पहुंचै जाय ।।

यह आपा तुम कूं दिया जित चाहौ तित राखि ।

चरनदास द्वारे परो भावै झिड़कौ लाखि ।।

जुदी जुदी पांचौ कहूं एक एक का भेद ।

जो कोइ इन कूं बस करै सबहीं छूटैं खेद ।।

सतगुरू मेरा सूरमा करै शब्द की चोट ।

मारै गोला प्रेम का ढहै भरम का कोट ।।

मुख सेती बोलन थका सुनै थका जो कान ।

पावन सूं फिरवा थका सतगुरू मारा बान ।।

सतगुरू शब्दी तीर है तन मन कीयो छेद ।

बेदरदी समझै नहीं बिरही पावै भेद ।।

इन्द्री मन मिलि होत है बिषय बासना चाह ।

उपजै जैसे काम हीं नारी मिलि अरू नाह ।।

जाति बरनकुल आस्रम मान बड़ाई खोय ।

जब सतगुरू के पग लगै सांच शिष्य ह्वै सोय ।।

हरि रूठैं कुछ डर नहीं तू भी दे छुटकाय ।

गुरू को राखौ सीस पर सब बिधि करैं सहाय ।।

सतगुरू ढूंढ़ा पाइये नहीं सुहेला होय ।

सिष भी पूरा कोइ हो सानी माटी जोय ।।

सतगुरू शब्दी तेग है लागत दो करि देहि ।

पीठ फेरि कायर भजै सूरा सनमुख लेहि ।।

दुर्जन के फूटे बिना तेरी होय न जीत ।

चरनहिदास बिचारि करि ऐसी कहिये रीत ।।

अंडा जब आगे गिरै तब गुरू लेवैं सेई ।

करै बराबर आपनी सिख को निस्सन्देह ।।

जित जित इन्द्री जात है तित मन कूं ले जात ।

बुधि भी संगहि जात है यह निस्चय करि बात ।।

सतगुरू शब्दी मारिया पूरा आया वार ।

प्रेमी जूझै खेत में लगा न राखा तार ।।

जित इन्द्री मन हूं गया रही कहां सूं बुध्दि ।

चरनदास यौं कहत हैं करि देखो तुम सुध्दि ।।

न्यारे न्यारे चहत है अपने अपने स्वाद ।

इन पांचौ में प्रीत है कछु न बाद बिबाद ।।

जौ वे बिछुरैं घड़ी भी तौ गंदा होइ जाय ।

चरनदास यौं कहत हैं गुरू को राखि रिझाय ।।

चलौ करै थिर ना रहै कोटि जतन करि राख ।

यह जबहीं बस होयगा इन्द्रिन के रसनाख ।।

इन्द्री रोके ते रुकैं और जतन नहिं कोय ।

मन चंचल रिझवार है रसिक सवादी होय ।।

सतगुरू शब्दी लागिया नावक का सा तीर ।

कसकत है निकसत नहीं होत प्रेम की पीर ।।

शब्द बान मोहिं मारिया लगी कलेजे माहिं ।

मारि हँसे सुकदेव जी बाकी छोड़ी नाहिं ।।

इन्द्रिन सूं मन जुदा करि सुरति निरति करि सोध ।

उपजै ना बिष बासना चरनदास कर बोध ।।

कांचे भांडे सूं रहै ज्यों कुम्हार का नेह ।

भीतर सूं इच्छा करै बाहर चाटै देह ।।

मैं मिरगा गुरू पारघी शब्द लगायो बान ।

चरनदास घायल गिरे तन मन बीधे प्रान ।।

सतगुरू शब्दी बान है अँग अँग डारे तोड़ ।

प्रेम खेत घायल गिरे टांका लगै न जोड़ ।।