hilal-e-id

chalnā sambhal sambhal ke zarā ai hilāl-e-īd

laġhzish na de kahīñ tire pā ko hujūm-e-dīd

mushtāq aaj terā har ik ḳhās-o-ām hai

dam le zarā sambhal ke baḌā izhdahām hai

ye ān-e-sabr-kash ye adā-e-hasīn-tar

ye e'tidāl-e-nūr ye ḳham qātil-e-nazar

ye husn-e-sarmadī kī tajallī jhalak meñ hai

yā chashm-e-nīm-bāz kī tābish palak meñ hai

yā darz khul ga.ī hai koī āsmān kī

duniyā ko jhāñktī hai tapish us jahān kī

chalna sambhal sambhal ke zara ai hilal-e-id

laghzish na de kahin tere pa ko hujum-e-did

mushtaq aaj tera har ek KHas-o-am hai

dam le zara sambhal ke baDa izhdaham hai

ye aan-e-sabr-kash ye ada-e-hasin-tar

ye e'tidal-e-nur ye KHam qatil-e-nazar

ye husn-e-sarmadi ki tajalli jhalak mein hai

ya chashm-e-nim-baz ki tabish palak mein hai

ya darz khul gai hai koi aasman ki

duniya ko jhankti hai tapish us jahan ki