خالقِ مطلق ہے شیدا تیرے گل و رخسار پر

خالقِ مطلق ہے شیدا تیرے گل و رخسار پر

یوسف مصری ہے صدقے ابروئے خمدار پر

قدر کی شب ہے نثار اور لیل کی سورت فدا

عنبر و مشکِ ختن ہیں زلفِ مشکیں بار پر

وارتے ہیں تن کو اپنے لعل و یا قوت اور گلاب

اے عرب کے نوجواں تیرے لبِ گلنار پر

کوئی صدقے ہو رہا ہے کوئی ہوتا ہے نثار

حور و غلماں اور رضواں سیدِ ابرار پر

ڈاکٹر حکما سب ہی عاجز علاجِ عشق سے

ہو کرم تیرا مسیحائے زماں بیمار پر

روک لے واعظ زباں قبر و عذابِ نار سے

امتِ عاصی ہے نازاں احمدِ مختار پر

ذاتِ یکتائے مدینہ پر سبھی صدقے ہوئے

تو فدا کر چل کے حنفیؔ جان مدنی ہار پر