guzarna sar se baam-e-’ishq ka chaDhna utarna hai

guzarnā sar se bām-e-’ishq kā chaḌhnā utarnā hai

jo marnā hai vo jiinā hai jo suulī hai vo ziinā hai

batā.ūñ aap ko nisbat ki mujh meñ yaar meñ kyā hai

maiñ ā.īna vo sūrat hai maiñ gum huuñ aur vo paidā hai

nazar aayā 'ajab mujh ko tamāsha chashm-e-haq-bīñ se

zamāna DhūñDhtā hai haq ko aur haq hī zamāna hai

vahī iz.hār-e-mā'nī hai jo gam honā hai sūrat kā

jo miTnā hai vo jiinā hai jo jiinā hai vo marnā hai

nikal parda-e-sūrat se jalva dekh mā'nī kā

jo mā'nī hai vo sūrat hai jo sūrat hai vo parda hai

'vatan' itnī samajh bhī gar kisī ko ho to kaafī hai

kidhar se maiñ kidhar aayā kidhar ab mujh ko jaanā hai

guzarna sar se baam-e-’ishq ka chaDhna utarna hai

jo marna hai wo jina hai jo suli hai wo zina hai

bataun aap ko nisbat ki mujh mein yar mein kya hai

main aaina wo surat hai main gum hun aur wo paida hai

nazar aaya 'ajab mujh ko tamasha chashm-e-haq-bin se

zamana DhunDhta hai haq ko aur haq hi zamana hai

wahi izhaar-e-ma'ni hai jo gam hona hai surat ka

jo miTna hai wo jina hai jo jina hai wo marna hai

nikal parda-e-surat se jalwa dekh ma'ni ka

jo ma'ni hai wo surat hai jo surat hai wo parda hai

'watan' itni samajh bhi gar kisi ko ho to kafi hai

kidhar se main kidhar aaya kidhar ab mujh ko jaana hai