kahun kya main furqat-e-yar mein mujhe khana-pina haram hai

kahūñ kyā maiñ furqat-e-yār meñ mujhe khānā-pīnā harām hai

usī ġham meñ jaañ pe aa banī koī dam meñ kaam tamām hai

mujhe bazm ġhair meñ dekh kar lagā kahne yuuñ but-e-'ishva-gar

yahāñ us ko kis ne bulā liyā ye to mere ghar kā ġhulām hai

ġham-e-hijr-e-yār meñ is qadar na taḌap tū ai dil-e-nauha-gar

abhī zabt kar abhī zabt kar yahī rok hai yahī thaam hai

kise tāb-e-sabr hai sāqiyā mujhe bhar ke chullū meñ de pilā

yahī ḳhum samajh yahī hai subū yahī shīsha hai yahī jaam hai

mere mah-jabīñ mere mah-laqā tujhe dil se kaise karūñ judā

koī ho hasīñ to huā kare mujhe terī diid se kaam hai

karo dil kā kahnā magan-magan raho paas ġhairoñ ke jān-e-man

mere hāl-e-zār se hai kyā ġharaz tumheñ apne kaam se kaam

rukH-e-jāñ-fizā pe jo ḳhaal hai bichhā us pe zulf kā ye haal hai

tujhe donoñ hāthoñ se bandagī tirī dostī ko salām hai

pas-e-marg ‘tāhir’-e-kHush-bayāñ terī yaad hogī jahāñ-tahāñ

tujhe shā.irī kī sanad milī tirā ’ishq-bāzoñ meñ naam hai

kahun kya main furqat-e-yar mein mujhe khana-pina haram hai

usi gham mein jaan pe aa bani koi dam mein kaam tamam hai

mujhe bazm ghair mein dekh kar laga kahne yun but-e-'ishwa-gar

yahan us ko kis ne bula liya ye to mere ghar ka ghulam hai

gham-e-hijr-e-yar mein is qadar na taDap tu ai dil-e-nauha-gar

abhi zabt kar abhi zabt kar yahi rok hai yahi tham hai

kise tab-e-sabr hai saqiya mujhe bhar ke chullu mein de pila

yahi KHum samajh yahi hai subu yahi shisha hai yahi jam hai

mere mah-jabin mere mah-laqa tujhe dil se kaise karun juda

koi ho hasin to hua kare mujhe teri did se kaam hai

karo dil ka kahna magan-magan raho pas ghairon ke jaan-e-man

mere haal-e-zar se hai kya gharaz tumhein apne kaam se kaam

rukH-e-jaan-fiza pe jo KHal hai bichha us pe zulf ka ye haal hai

tujhe donon hathon se bandagi teri dosti ko salam hai

pas-e-marg ‘tahir’-e-kHush-bayan teri yaad hogi jahan-tahan

tujhe shairi ki sanad mili tera ’ishq-bazon mein nam hai