teri ek nigah ki qimat meri zindagi nahin hai

terī ik nigāh kī qīmat merī zindagī nahīñ hai

tere us karam kā badla merī bandagī nahīñ hai

jo na jaañ pe khel jaa.e vo na is taraf ko aa.e

ki dayār-e-’āshiqī meñ rah-e-vāpsī nahīñ hai

tere husn kī parastish merā mashrab-e-tarīqat

ye hai dīn-e-pāk-bāzāñ koī kāfirī nahīñ hai

koī mast-e-chashm-e-sāqī koī hai shahīd-e-ġhamza

har bāda-kash kī hālat yahāñ ek sī nahīñ hai

rahe 'umr-bhar bhaTakte vo na zulmatoñ se nikle

tere āftāb-e-ruḳh kī jahāñ raushnī nahīñ hai

hai sharāb-e-'ishq-e-sāqī ġham-e-do-jahāñ kā darmāñ

ai 'alīm' us se behtar koī mai-kahsī nahīñ hai

teri ek nigah ki qimat meri zindagi nahin hai

tere us karam ka badla meri bandagi nahin hai

jo na jaan pe khel jae wo na is taraf ko aae

ki dayar-e-’ashiqi mein rah-e-wapsi nahin hai

tere husn ki parastish mera mashrab-e-tariqat

ye hai din-e-pak-bazan koi kafiri nahin hai

koi mast-e-chashm-e-saqi koi hai shahid-e-ghamza

har baada-kash ki haalat yahan ek si nahin hai

rahe 'umr-bhar bhaTakte wo na zulmaton se nikle

tere aaftab-e-ruKH ki jahan raushni nahin hai

hai sharab-e-'ishq-e-saqi gham-e-do-jahan ka darman

ai 'alim' us se behtar koi mai-kahsi nahin hai