sambhal kar dekhna barq-e-tajalla dekhne wale

sambhal kar dekhnā barq-e-tajallā dekhne vaale

tamāsha ḳhud na ban jaanā tamāsha dekhne vaale

dil-e-nādāñ zarā ḳhuddār ban himmat na haar apnī

ki gir paḌte haiñ ġhairoñ kā sahārā dekhne vaale

nikal parde se ḳhud apnā tamāsha dekhne vaale

hazāroñ muntazir haiñ terā jalva dekhne vaale

kahīñ ibtidā-e-'ishq meñ majnūñ na ban jaanā

are chhup-chhup ke o tasvīr-e-lailā dekhne vaale

jo us ko dekhnā chāhe na dekhe apnī hastī ko

hue maḳhlūq kī nazroñ meñ rusvā dekhne vaale

kalīmullāh agar haiñ tūr-e-sīnā dekhne vaale

hameñ dekho ki ham haiñ us kā jalva dekhne vaale

guzārī 'umr saarī us ke jalve kī tamannā meñ

ḳhud apne aap ko tum ne na dekhā dekhne vaale

sarāpā ā.īna ban kar jo vo hairat meñ baiThe haiñ

bane haiñ aap hī apnā tamāsha dekhne vaale

mire barbād hone kā nazāra dekhne vaale

ye terī mehrbānī hai tamāsha dekhne vaale

koī hamdard sachchā is zamāne meñ nahīñ 'ahmad'

nazar aate haiñ sab mujh ko tamāsha dekhne vaale

muqaddar un kā achchhā vahī maqbūl bande haiñ

vahī jannat meñ jā.eñge madīna dekhne vaale

sambhal kar dekhna barq-e-tajalla dekhne wale

tamasha KHud na ban jaana tamasha dekhne wale

dil-e-nadan zara KHuddar ban himmat na haar apni

ki gir paDte hain ghairon ka sahaara dekhne wale

nikal parde se KHud apna tamasha dekhne wale

hazaron muntazir hain tera jalwa dekhne wale

kahin ibtida-e-'ishq mein majnun na ban jaana

are chhup-chhup ke o taswir-e-laila dekhne wale

jo us ko dekhna chahe na dekhe apni hasti ko

hue maKHluq ki nazron mein ruswa dekhne wale

kalimullah agar hain tur-e-sina dekhne wale

hamein dekho ki hum hain us ka jalwa dekhne wale

guzari 'umr sari us ke jalwe ki tamanna mein

KHud apne aap ko tum ne na dekha dekhne wale

sarapa aaina ban kar jo wo hairat mein baiThe hain

bane hain aap hi apna tamasha dekhne wale

mere barbaad hone ka nazara dekhne wale

ye teri mehrbani hai tamasha dekhne wale

koi hamdard sachcha is zamane mein nahin 'ahmad'

nazar aate hain sab mujh ko tamasha dekhne wale

muqaddar un ka achchha wahi maqbul bande hain

wahi jannat mein jaenge madina dekhne wale