mera chahna dekh kya chahta hun

mirā chāhnā dekh kyā chāhtā huuñ

faqat tujh ko jān-e-vafā chāhtā huuñ

mire ho hamesha rahoge mire hī

kaho muñh se tere sunā chāhtā huuñ

vafā kā huuñ tālib vafā kī hai 'ādat

vafā kar rahā huuñ vafā chāhtā huuñ

mohabbat ho donoñ taraf ek jaisī

ye kyā kah rahā huuñ ye kyā chāhtā huuñ

rahe ab na baaqī zarā ajnabiyyat

maiñ terā sarāpā banā chāhtā huuñ

tire pyaar kī pyārī duniyā meñ kho kar

tire pyaar kā aasrā chāhtā huuñ

mohabbat meñ donoñ ko ho be-qarārī

maiñ is ke sivā aur kyā chāhtā huuñ

tirī mast āñkhoñ se āñkheñ milā kar

maiñ yuuñ mast-o-be-ḳhud banā chāhtā huuñ

amīn-e-mohabbat raheñ donoñ 'mushtāq'

yahī tujh se ġhaus-ul-varā chāhtā huuñ

mera chahna dekh kya chahta hun

faqat tujh ko jaan-e-wafa chahta hun

mere ho hamesha rahoge mere hi

kaho munh se tere suna chahta hun

wafa ka hun talib wafa ki hai 'adat

wafa kar raha hun wafa chahta hun

mohabbat ho donon taraf ek jaisi

ye kya kah raha hun ye kya chahta hun

rahe ab na baqi zara ajnabiyyat

main tera sarapa bana chahta hun

tere pyar ki pyari duniya mein kho kar

tere pyar ka aasra chahta hun

mohabbat mein donon ko ho be-qarari

main is ke siwa aur kya chahta hun

teri mast aankhon se aankhen mila kar

main yun mast-o-be-KHud bana chahta hun

amin-e-mohabbat rahen donon 'mushtaq'

yahi tujh se ghaus-ul-wara chahta hun