aarzu-e-wasl-e-jaanan mein sahar hone lagi

ārzū-e-vasl-e-jānāñ meñ sahar hone lagī

zindagī mānind-e-sham.a muḳhtasar hone lagī

rāz-e-ulfat khul na jaa.e baat rah jaa.e mirī

bazm-e-jānāñ meñ ilāhī chashm-e-tar hone lagī

ab shakeb-e-dil kahāñ hasrat hī hasrat rah ga.ī

zindagī ik ḳhvāb kī sūrat basar hone lagī

ye tilism-e-husn hai yā ki ma.āl-e-'ishq hai

apnī nākāmī hī apnī rāhbar hone lagī

sun rahā huuñ aa rahe haiñ vo sar-e-bālīn aaj

merī āh-e-nā-rasā bhī bā-asar hone lagī

un se vābasta ummīdeñ jo bhī thiiñ vo miT ga.iiñ

ab tabī'at aap apnī chāra-gar hone lagī

vo tabassum thā ki barq-e-husn kā e'jāz thā

kā.enāt-e-jān-o-dil zer-o-zabar hone lagī

dil kī dhaḌkan baḌh ga.ī āñkhoñ meñ aañsū aa ga.e

ġhāliban merī taraf un kī nazar hone gī

jab chalā 'mushtāq' apnā kārvāñ sū-e-'adam

yaas ham-āġhosh ho kar ham-safar hone lagī

aarzu-e-wasl-e-jaanan mein sahar hone lagi

zindagi manind-e-shama muKHtasar hone lagi

raaz-e-ulfat khul na jae baat rah jae meri

bazm-e-jaanan mein ilahi chashm-e-tar hone lagi

ab shakeb-e-dil kahan hasrat hi hasrat rah gai

zindagi ek KHwab ki surat basar hone lagi

ye tilism-e-husn hai ya ki maal-e-'ishq hai

apni nakaami hi apni rahbar hone lagi

sun raha hun aa rahe hain wo sar-e-baalin aaj

meri aah-e-na-rasa bhi ba-asar hone lagi

un se wabasta ummiden jo bhi thin wo miT gain

ab tabi'at aap apni chaara-gar hone lagi

wo tabassum tha ki barq-e-husn ka e'jaz tha

kaenat-e-jaan-o-dil zer-o-zabar hone lagi

dil ki dhaDkan baDh gai aankhon mein aansu aa gae

ghaaliban meri taraf un ki nazar hone gi

jab chala 'mushtaq' apna karwan su-e-'adam

yas ham-aghosh ho kar ham-safar hone lagi