kabhi to chhaTega faza se andhera kabhi to madhur chandni raat hogi

kabhī to chhaTegā fazā se añdherā kabhī to madhur chāñdnī raat hogī

kabhī to jaleñge charāġh-e-mohabbat usī roz un se mulāqāt hogī

agar dam-badam vo hameñ yaad aa.eñ shab-e-ġham kī tārīk tanhā.iyoñ meñ

to bikhreñgī zulfeñ to chhā.eñge bādal jo Tapkeñge aañsū vo barsāt hogī

ġhazab hai idhar merī jaañ pe banī hai udhar un ke paañv meñ mehñdī lagī hai

agar aise 'ālam meñ bhī tum na aa.e to kyā hashr ke din mulāqāt hogī

marīz-e-mohabbat kā hai vaqt-e-āḳhir ḳhudā ke liye ab chale bhī to aao

agar tum na aa.e ai jān-e-masīhā to ye raat phir āḳhirī raat hogī

judā.ī ke lamhe qarīb aa ga.e haiñ sitāroñ ke dil Dūbte jā rahe haiñ

idhar aao tum ko gale se lagā luuñ ḳhudā jaane phir kab mulāqāt hogī

ye duniyā do-rañgī 'ajab 'ishq kī bāteñ agar pyaar māñgo to hasrat milegī

chaman zindagī ke hazāroñ khileñge magar ek dil kī kalī na milegī

fazā chup ghaTā chup zamīñ āsmāñ chup chaman chup kalī chup haiñ aur kahkashāñ chup

udhar vo bhī chup haiñ idhar maiñ bhī chup huuñ ilāhī merī raat kaise kaTegī

kahīñ giit gūñjegī shahnā.iyoñ ke kahīñ āh-o-zārī kahīñ shor-e-mātam

kisī kā kahīñ se janāza uThegā kisī ghar se dūlhan kī Dolī uThegī

lage har qadam par hasīnoñ ke mele kisī ne kabhī 'maqbūl' itnā na pūchhā

kahāñ jā rahe ho akele-akele rah-e-zindagī yuuñ na tanhā kaTegī

kabhi to chhaTega faza se andhera kabhi to madhur chandni raat hogi

kabhi to jalenge charagh-e-mohabbat usi roz un se mulaqat hogi

agar dam-badam wo hamein yaad aaen shab-e-gham ki tarik tanhaiyon mein

to bikhrengi zulfen to chhaenge baadal jo Tapkenge aansu wo barsat hogi

ghazab hai idhar meri jaan pe bani hai udhar un ke panw mein mehndi lagi hai

agar aise 'alam mein bhi tum na aae to kya hashr ke din mulaqat hogi

mariz-e-mohabbat ka hai waqt-e-aKHir KHuda ke liye ab chale bhi to aao

agar tum na aae ai jaan-e-masiha to ye raat phir aaKHiri raat hogi

judai ke lamhe qarib aa gae hain sitaron ke dil Dubte ja rahe hain

idhar aao tum ko gale se laga lun KHuda jaane phir kab mulaqat hogi

ye duniya do-rangi 'ajab 'ishq ki baaten agar pyar mango to hasrat milegi

chaman zindagi ke hazaron khilenge magar ek dil ki kali na milegi

faza chup ghaTa chup zamin aasman chup chaman chup kali chup hain aur kahkashan chup

udhar wo bhi chup hain idhar main bhi chup hun ilahi meri raat kaise kaTegi

kahin git gunjegi shahnaiyon ke kahin aah-o-zari kahin shor-e-matam

kisi ka kahin se janaza uThega kisi ghar se dulhan ki Doli uThegi

lage har qadam par hasinon ke mele kisi ne kabhi 'maqbul' itna na puchha

kahan ja rahe ho akele-akele rah-e-zindagi yun na tanha kaTegi