mar miTe jab hum to kuchh-kuchh rah par aane lage

mar miTe jab ham to kuchh-kuchh raah par aane lage

vo hamārī qabr ko aa-ā ke Thukrāne lage

apne dāman kī havā dete haiñ jin ko ġhash meñ aap

aañkh kyuuñ khulne lagī kyuuñ hosh meñ aane lage

'ishq meñ marnā hayāt-e-jāvedānī hai mujhe

tum salāmat mere dushman jaan se jaane lage

aap ye achchhī tasallī ham ko dene aa.e the

pūchh kar bā'is taḌap kā aur taḌpāne lage

kyā kisī hasrat bharī dil ko kiyā hai pā.emāl

haath kuchh mal mal ke kyuuñ us vaqt pachhtāne lage

intihā kī shoḳh-chashm ai dil samajhnā tū use

be-hijābī kī jagah jo aañkh sharmāne lage

baiTh jaane kī ijāzat us ne dī hai thoḌī der

bas 'jalāl' uTTho bahut tum paañv phailāne lage

mar miTe jab hum to kuchh-kuchh rah par aane lage

wo hamari qabr ko aa-a ke Thukrane lage

apne daman ki hawa dete hain jin ko ghash mein aap

aankh kyun khulne lagi kyun hosh mein aane lage

'ishq mein marna hayat-e-jawedani hai mujhe

tum salamat mere dushman jaan se jaane lage

aap ye achchhi tasalli hum ko dene aae the

puchh kar ba'is taDap ka aur taDpane lage

kya kisi hasrat bhari dil ko kiya hai paemal

hath kuchh mal mal ke kyun us waqt pachhtane lage

intiha ki shoKH-chashm ai dil samajhnā tu use

be-hijabi ki jagah jo aankh sharmane lage

baiTh jaane ki ijazat us ne di hai thoDi der

bas 'jalal' uTTho bahut tum panw phailane lage