KHanjar laga tu qatil tewri badal-badal kar

ḳhanjar lagā tū qātil tevrī badal-badal kar

armān taaki nikleñ dil se machal-machal kar

āñkheñ kabhī dikhā.eñ palkeñ kabhī bichhā.eñ

nashtar lagā.ī maiñ ne kyā-kyā sambhal sambhal kar

siina se dil meñ aa kar dil se jigar meñ aa kar

tīr-e-nazar chale haiñ pahlū badal-badal kar

pīchhā na chhoḌā shab ko un kī hayā ne merā

shab bhar yuuñ hī guzārī karvaT badal-badal kar

vo hoñ sitam-rasīda marne ke baa'd apne

rotī haiñ hasrateñ bhī dil se nikal-nikal kar

hai chaar din kī ye to sab chāñdnī jahāñ meñ

chal degā ye zamāna karvaT badal-badal kar

KHanjar laga tu qatil tewri badal-badal kar

arman taki niklen dil se machal-machal kar

aankhen kabhi dikhaen palken kabhi bichhaen

nashtar lagai main ne kya-kya sambhal sambhal kar

sina se dil mein aa kar dil se jigar mein aa kar

tir-e-nazar chale hain pahlu badal-badal kar

pichha na chhoDa shab ko un ki haya ne mera

shab bhar yun hi guzari karwaT badal-badal kar

wo hon sitam-rasida marne ke ba'd apne

roti hain hasraten bhi dil se nikal-nikal kar

hai chaar din ki ye to sab chandni jahan mein

chal dega ye zamana karwaT badal-badal kar