kufr-e-sanam nasib hua salam ho na ho

kufr-e-sanam nasīb huā salām ho na ho

maqbūl-e-kHās-o-’ām ye badnām ho na ho

ā.eñge sar-ba-sar tere bāzār-e-'ishq meñ

tauhīn hī sahī chalo ikrām ho na ho

jalte raheñge jab talak is tan meñ jaan hai

rāh-e-daraz-e-’ishq sar-anjām ho na ho

be-iḳhtiyār aap ke kūcha se ai sanam

bād-e-sabā tū aa.egī paiġhām ho na ho

shīrīñ laboñ se aap ke vo gāliyāñ sahī

bos-o-kanār kā hameñ in'ām ho na ho

'āshiq hai jo murād pe us yaar ke chale

hasb-e-murād us ke dil-ārām ho na ho

mast-e-kHarāb-e-hāl ko dar se na roknā

saaqī sharāb-e-nāb se pur jaam ho na ho

matlab hai 'ishq aur koī aarzū nahīñ

dīdār-e-zul-jalāl-val-ikrām ho na ho

sañg-e-dar-e-habīb se uTThe na sar 'ġhulām'

maqsūd bar aa.e na aa.e kaam ho na ho

kufr-e-sanam nasib hua salam ho na ho

maqbul-e-kHas-o-’am ye badnam ho na ho

aaenge sar-ba-sar tere bazar-e-'ishq mein

tauhin hi sahi chalo ikram ho na ho

jalte rahenge jab talak is tan mein jaan hai

rah-e-daraz-e-’ishq sar-anjam ho na ho

be-iKHtiyar aap ke kucha se ai sanam

baad-e-saba tu aaegi paigham ho na ho

shirin labon se aap ke wo galiyan sahi

bos-o-kanar ka hamein in'am ho na ho

'ashiq hai jo murad pe us yar ke chale

hasb-e-murad us ke dil-aram ho na ho

mast-e-kHarab-e-haal ko dar se na rokna

saqi sharab-e-nab se pur jam ho na ho

matlab hai 'ishq aur koi aarzu nahin

didar-e-zul-jalal-wal-ikram ho na ho

sang-e-dar-e-habib se uTThe na sar 'ghulam'

maqsud bar aae na aae kaam ho na ho