tauhid ka maza hai ki ghair-e-KHuda na ho

tauhīd kā mazā hai ki ġhair-e-ḳhudā na ho

dil meñ tamīz dair-o-haram kī zarā na ho

nūr-e-ḳhudā nazar meñ na aa.egā jab talak

zañg-e-ḳhudī se ā.īna-e-dil safā na ho

bahattar hai vo sharāb ki jis meñ ho be-ḳhudī

kis kaam kī namāz hai jis meñ mazā na ho

labb-e-lubā-e-jumla kamālāt-e-'ishq hai

mumkin nahīñ ki 'ishq bhī ho auliyā na ho

lete haiñ dostī meñ vo lekin ye shart hai

'āshiq ho mai-parast bhī ho pārsā na ho

duniyā parast bhī hoñ vilāyat ke mudda'ī

faqr-o-fanā meñ gar kahīñ rañj-o-balā na ho

darbār-e-husn meñ yahī qānūn paas hai

nāz-o-adā to ho magar mehr-o-vafā na ho

dilbar to hai qarīb-tar apnī hayāt se

'uqda khule kahāñ se agar peshvā na ho

apnī ḳhudī ko chhoḌ ke kahnā 'ġhulām' ko

mansūr kī tarah jo laboñ par anā na ho

tauhid ka maza hai ki ghair-e-KHuda na ho

dil mein tamiz dair-o-haram ki zara na ho

nur-e-KHuda nazar mein na aaega jab talak

zang-e-KHudi se aaina-e-dil safa na ho

bahattar hai wo sharab ki jis mein ho be-KHudi

kis kaam ki namaz hai jis mein maza na ho

labb-e-luba-e-jumla kamalat-e-'ishq hai

mumkin nahin ki 'ishq bhi ho auliya na ho

lete hain dosti mein wo lekin ye shart hai

'ashiq ho mai-parast bhi ho parsa na ho

duniya parast bhi hon wilayat ke mudda'i

faqr-o-fana mein gar kahin ranj-o-bala na ho

darbar-e-husn mein yahi qanun pas hai

naz-o-ada to ho magar mehr-o-wafa na ho

dilbar to hai qarib-tar apni hayat se

'uqda khule kahan se agar peshwa na ho

apni KHudi ko chhoD ke kahna 'ghulam' ko

mansur ki tarah jo labon par ana na ho