chahne jab se laga hai mera dildar mujhe

chāhne jab se lagā hai merā dildār mujhe

dekh kar rashk kiyā karte haiñ aġhyār mujhe

kyuuñ hairat se bhalā dekhūñ har ik zarre ko

jab ki har shai meñ nazar aate haiñ sarkār mujhe

jab ki dīdār dikhānā tujhe manzūr na thā

kyuuñ banāyā gayā phir tālib-e-dīdār mujhe

sirf mai-ḳhāna kā maiñ zikr kiyā karatā huuñ

ḳhvāh-maḳhvāh log kahā karte haiñ mai-ḳhvār mujhe

bārhā maut mujhe lene ko aa.ī thī magar

ho ke māyūs ga.ī dekh ke bedār mujhe

pūjnā ḳhud ko sub.h-o-shām hai fitrat merī

log samjhe nahīñ kahte rahe ḳhuddār mujhe

haath meñ sāġhar-e-al-haq ho aur qazā aa jaa.e

yahī tākīd huā kartī hai har baar mujhe

'ishq kī ho ga.ī me'arāj bajā hai 'rizvāñ'

kahīñ rusvā na ye kar de sar-e-bāzār mujhe

chahne jab se laga hai mera dildar mujhe

dekh kar rashk kiya karte hain aghyar mujhe

kyun hairat se bhala dekhun har ek zarre ko

jab ki har shai mein nazar aate hain sarkar mujhe

jab ki didar dikhana tujhe manzur na tha

kyun banaya gaya phir talib-e-didar mujhe

sirf mai-KHana ka main zikr kiya karata hun

KHwah-maKHwah log kaha karte hain mai-KHwar mujhe

barha maut mujhe lene ko aai thi magar

ho ke mayus gai dekh ke bedar mujhe

pujna KHud ko subh-o-sham hai fitrat meri

log samjhe nahin kahte rahe KHuddar mujhe

hath mein saghar-e-al-haq ho aur qaza aa jae

yahi takid hua karti hai har bar mujhe

'ishq ki ho gai me'araj baja hai 'rizwan'

kahin ruswa na ye kar de sar-e-bazar mujhe