muddat se hamein dair-o-haram DhunD rahe hain

muddat se hameñ dair-o-haram DhūñD rahe haiñ

ham haiñ ki tirā naqsh-e-qadam DhūñD rahe haiñ

kuchh rañg pai-e-dīda-e-nam DhūñD rahe haiñ

ġham DhūñD chuke raunaq-e-ġham DhūñD rahe haiñ

ai dāman-e-rañgīñ mire ashkoñ ko chhupā le

kab se tujhe māyūs-e-karam DhūñD rahe haiñ

phūloñ ke nagar meñ kabhī kāñToñ ke nagar meñ

ham tujh ko tire sar kī qasam DhūñD rahe haiñ

kyā baat hai dīvāne sar-e-dār-o-rasan bhī

ai dost tirī zulf ke ḳham DhūñD rahe haiñ

mai-ḳhāne meñ ham baiThe haiñ har ġham ko bhulā kar

mai-ḳhāne ke bāhar hameñ ġham DhūñD rahe haiñ

is gosha-e-tanhā.ī se ab niklo ḳhudā-rā

'qaisar' tumheñ kuchh ahl-e-qalam DhūñD rahe haiñ

muddat se hamein dair-o-haram DhunD rahe hain

hum hain ki tera naqsh-e-qadam DhunD rahe hain

kuchh rang pai-e-dida-e-nam DhunD rahe hain

gham DhunD chuke raunaq-e-gham DhunD rahe hain

ai daman-e-rangin mere ashkon ko chhupa le

kab se tujhe mayus-e-karam DhunD rahe hain

phulon ke nagar mein kabhi kanTon ke nagar mein

hum tujh ko tere sar ki qasam DhunD rahe hain

kya baat hai diwane sar-e-dar-o-rasan bhi

ai dost teri zulf ke KHam DhunD rahe hain

mai-KHane mein hum baiThe hain har gham ko bhula kar

mai-KHane ke bahar hamein gham DhunD rahe hain

is gosha-e-tanhai se ab niklo KHuda-ra

'qaisar' tumhein kuchh ahl-e-qalam DhunD rahe hain