mujhi se mera gila hai to koi baat nahin

mujhī se merā gila hai to koī baat nahīñ

ye imtihān-e-vafā hai to koī baat nahīñ

ġham-e-hayāt sivā hai to koī baat nahīñ

hamārā haal burā hai to koī baat nahīñ

vo mujh se aaj ḳhafā hai to koī baat nahīñ

ye intihā-e-jafā hai to koī baat nahīñ

jo guuñj uTThī hai Takrā ke dil ke goshoñ se

vo mere dil kī sadā hai to koī baat nahīñ

vo ġham ki jis ne hazāroñ ko kar diyā pāmāl

tumhāre dar se milā hai to koī baat nahīñ

ḳhatā mu'āf tumhārī adāoñ par marnā

tum hī kaho ye ḳhatā hai to koī baat nahīñ

qadam qadam pe jalā.e haiñ hasratoñ ke charāġh

añdherā aaj ghanā hai to koī baat nahīñ

jo mai-kada se uThāyā gayā thā mai-ḳhvāro

haram kī samt gayā hai to koī baat nahīñ

talāsh jis kī azal se hai mujh ko ai 'qaisar'

vo mere dil meñ chhupā hai to koī baat nahīñ

mujhi se mera gila hai to koi baat nahin

ye imtihan-e-wafa hai to koi baat nahin

gham-e-hayat siwa hai to koi baat nahin

hamara haal bura hai to koi baat nahin

wo mujh se aaj KHafa hai to koi baat nahin

ye intiha-e-jafa hai to koi baat nahin

jo gunj uTThi hai Takra ke dil ke goshon se

wo mere dil ki sada hai to koi baat nahin

wo gham ki jis ne hazaron ko kar diya pamal

tumhaare dar se mila hai to koi baat nahin

KHata mu'af tumhaari adaon par marna

tum hi kaho ye KHata hai to koi baat nahin

qadam qadam pe jalae hain hasraton ke charagh

andhera aaj ghana hai to koi baat nahin

jo mai-kada se uThaya gaya tha mai-KHwaro

haram ki samt gaya hai to koi baat nahin

talash jis ki azal se hai mujh ko ai 'qaisar'

wo mere dil mein chhupa hai to koi baat nahin