dil-e-insan bhi allah jaane kya tamasha hai

dil-e-insāñ bhī allāh jaane kyā tamāsha hai

sitam kī us meñ bastī hai karam kī us meñ duniyā hai

tū apnī chāñdnī de kar na ai mahtāb zahmat kar

hamāre ḳhāna-e-tārīk meñ ġham kā ujālā hai

qubūliyat pe bekas kā tayaqqun ai ma'āz-allāh

ki hai sarf-e-du'ā har chand mahrūm-e-tamannā hai

mire zauq-e-nazar ne aabrū baḳhshī hai jalvoñ ko

mirī dīvāngī-e-ā.īna-dār-e-husn-e-yaktā hai

jabīn-e-bandagī āzād ho qaid ta'ayyun se

ki farq-e-dair-o-ka.aba hī harīf-e-zauq-e-sajda hai

diyā karatā thā duniyā ko kabhī jo dars-e-kHuddārī

vahī insāñ ab minnat-pazīr-e-ahl-e-duniyā hai

‘niyāz-e-be-zabāñ bazm-e-suḳhan meñ aur zabāñ khole

ye sab kuchh hazrat-e-ustād kī sohbat kā sadqa hai

dil-e-insan bhi allah jaane kya tamasha hai

sitam ki us mein basti hai karam ki us mein duniya hai

tu apni chandni de kar na ai mahtab zahmat kar

hamare KHana-e-tarik mein gham ka ujala hai

qubuliyat pe bekas ka tayaqqun ai ma'az-allah

ki hai sarf-e-du'a har chand mahrum-e-tamanna hai

mere zauq-e-nazar ne aabru baKHshi hai jalwon ko

meri diwangi-e-aina-dar-e-husn-e-yakta hai

jabin-e-bandagi aazad ho qaid ta'ayyun se

ki farq-e-dair-o-kaba hi harif-e-zauq-e-sajda hai

diya karata tha duniya ko kabhi jo dars-e-kHuddari

wahi insan ab minnat-pazir-e-ahl-e-duniya hai

‘niyaz-e-be-zaban bazm-e-suKHan mein aur zaban khole

ye sab kuchh hazrat-e-ustad ki sohbat ka sadqa hai