koi kis tarah raaz-e-ulfat chhupae

koī kis tarah rāz-e-ulfat chhupā.e

nigāheñ milīñ aur qadam Dagmagā.e

vo majbūriyoñ par mirī muskurā.e

yahāñ tak to pahuñche yahāñ tak to aa.e

mohabbat meñ kuchh ittifāqāt bhī the

ki jo merī taqdīr banñe na paa.e

zamāne ke jaur-o-sitam tauba tauba

ki aksar to mujh ko na tum yaad aa.e

vo is tarh mere barābar se guzre

adā.eñ sambhāle nigāheñ jhukā.e

tire rū-ba-rū gar nazar mutma.in ho

to siine meñ dil bhī dhaḌakne na paa.e

ye 'ālam bhī guzrā tirī anjuman meñ

na uTThā hī jaa.e na baiThā hī jaa.e

koi kis tarah raaz-e-ulfat chhupae

nigahen milin aur qadam Dagmagae

wo majburiyon par meri muskurae

yahan tak to pahunche yahan tak to aae

mohabbat mein kuchh ittifaqat bhi the

ki jo meri taqdir banne na pae

zamane ke jaur-o-sitam tauba tauba

ki aksar to mujh ko na tum yaad aae

wo is tarh mere barabar se guzre

adaen sambhaale nigahen jhukae

tere ru-ba-ru gar nazar mutmain ho

to sine mein dil bhi dhaDakne na pae

ye 'alam bhi guzra teri anjuman mein

na uTTha hi jae na baiTha hi jae