kisi ke husn ka ejaz hun main

kisī ke husn kā e'jāz huuñ maiñ

ki sar-basta hadīs-e-rāz huuñ maiñ

niyāz-e-'ishq-e-shān-e-nāz huuñ maiñ

jahān-e-rāz-e-jān-e-rāz huuñ maiñ

azal se tā-abad manzil hai merī

yahāñ tak mā.il-e-parvāz huuñ maiñ

ḳhirad kī gutthiyoñ meñ aisā uljhā

ki ab tak vaqf-e-soz-o-sāz huuñ maiñ

jo gūñjā thā kabhī sāz-e-azal par

vahī naġhma vahī āvāz huuñ maiñ

maiñ marne ke liye paidā huā huuñ

isī anjām kā āġhāz huuñ maiñ

tamannā-e-dil-e-‘bedār’ tum ho

kHudā-e-nā-kHudā-e-nāz huuñ maiñ

kisi ke husn ka e'jaz hun main

ki sar-basta hadis-e-raaz hun main

niyaz-e-'ishq-e-shan-e-naz hun main

jahan-e-raaz-e-jaan-e-raaz hun main

azal se ta-abad manzil hai meri

yahan tak mail-e-parwaz hun main

KHirad ki gutthiyon mein aisa uljha

ki ab tak waqf-e-soz-o-saz hun main

jo gunja tha kabhi saz-e-azal par

wahi naghma wahi aawaz hun main

main marne ke liye paida hua hun

isi anjam ka aaghaz hun main

tamanna-e-dil-e-‘bedar’ tum ho

kHuda-e-na-kHuda-e-naz hun main