hamein malum tha jab inqilab aaega duniya mein

hameñ mā'lūm thā jab inqilāb aa.egā duniyā meñ

bayābāñ kaun dekhegā gulistāñ kaun dekhegā

asīroñ ne taḌap kar bekasī meñ jaan hī de dī

ba-hasrat ab dar-o-divār-e-zindāñ kaun dekhegā

chale to jaa.eñ dīvāne hudūd-e-sahn-e-gulshan se

magar hañgāma-e-fasl-e-bahārāñ kaun dekhegā

hamāre dam se raunaq hai bahāroñ meñ chaman vaalo

hamāre baa'd ye nazm-e-gulistāñ kaun dekhegā

ye duniyā hai sitam-pesha jafā-parvar zamāna hai

kisī mazlūm kī āñkhoñ meñ tūfāñ kaun dekhegā

fazā.eñ ḳhuun meñ Duubī huiiñ haiñ bazm-e-ālam kī

ye jañg-e-imtiyāz-e-kufr-o-īmāñ kaun dekhegā

zamāna vajd meñ naġhma-sarā hai sāz-e-hastī par

mirā TuuTā huā tār-e-rag-e-jāñ kaun dekhegā

uchhaltī haiñ ye nabzeñ tez-tar haiñ ḳhuun kī maujeñ

na jaane nok-e-nashtar se rag-e-jāñ kaun dekhegā

kisī ke naqsh-e-pā par be-ḳhudī meñ kar liyā sajda

jabīñ hai mahram-e-asrār-e-īmāñ kaun dekhegā

maze se log gahrī niiñd meñ jab so rahe hoñge

ba-juz 'bedār' ke sub.h-e-daraḳhshāñ kaun dekhegā

hamein ma'lum tha jab inqilab aaega duniya mein

bayaban kaun dekhega gulistan kaun dekhega

asiron ne taDap kar bekasi mein jaan hi de di

ba-hasrat ab dar-o-diwar-e-zindan kaun dekhega

chale to jaen diwane hudud-e-sahn-e-gulshan se

magar hangama-e-fasl-e-bahaaran kaun dekhega

hamare dam se raunaq hai bahaaron mein chaman walo

hamare ba'd ye nazm-e-gulistan kaun dekhega

ye duniya hai sitam-pesha jafa-parwar zamana hai

kisi mazlum ki aankhon mein tufan kaun dekhega

fazaen KHun mein Dubi huin hain bazm-e-alam ki

ye jang-e-imtiyaz-e-kufr-o-iman kaun dekhega

zamana wajd mein naghma-sara hai saz-e-hasti par

mera TuTa hua tar-e-rag-e-jaan kaun dekhega

uchhalti hain ye nabzen tez-tar hain KHun ki maujen

na jaane nok-e-nashtar se rag-e-jaan kaun dekhega

kisi ke naqsh-e-pa par be-KHudi mein kar liya sajda

jabin hai mahram-e-asrar-e-iman kaun dekhega

maze se log gahri nind mein jab so rahe honge

ba-juz 'bedar' ke subh-e-daraKHshan kaun dekhega