طالب کو چاہیے کہ ایک لمحہ یادِ مطلوب سے غافل نہ ہو۔

طالب کو چاہیے کہ ہر وقت کی عبادت سے علٰحدہ علٰحدہ کیفیات کا امتیاز کرے اور خیال رکھے کہ نماز سے کیا کیفیت حاصل ہوتی ہے اور تلاوت سے کس قسم کا ظہور ہوتا ہے اور درسِ حدیث اور شغلِ تہلیل سے کیا ذوق پیدا ہوتا ہے، اسی طرح یہ خیال رکھے کہ لقمۂ شک سے کیسی ظلمت ہوتی ہے اور گناہوں سے کس قسم کی کدورت پیدا ہوتی ہے۔

طریقہ مجددیہ میں چار دریا فیض کے ہیں، نقشبندی قادری چشتی اور سہروردی لیکن اول غالب ہے۔

لائقِ پیری وہ شخص ہے کہ ضروری مسائل کا علم رکھتا ہو، مقاماتِ عشرہ صوفیہ مثل توکل و قناعت، زہد و صبر حاصل ہوں، اربابِ دنیا کی صحبت سے اجتناب رکھتا ہو، مشائخِ کرام کی صحبت سے فیض یافتہ ہو۔

جس وقت ہم مجاہدہ میں مشغول تھے، پچیس برس تک اپنے کو ایک حجرے میں بند کر رکھا تھا کہ نہ جاڑوں میں باہر آتا تھا اور نہ گرمیوں میں نیز فرمایا کہ سترہ سال کی عمر تھی کہ دہلی آیا تھا اور اب مجھ کو دہلی میں ساٹھ سال گذر چکے ہیں مگر ایک روز بھی بلا ذکر و فکر اور مراقبہ کے نہیں گذرا، ہر وقت خوفِ خاتمہ دامن گیر ہے اور اطمینان تو اس وقت ہوگا جب کہ بہشت میں داخل ہو جاؤں گا اور اپنے کانوں سے ندائے ربُ العالمین سن لوں گا کہ اے بندے! میں تجھ سے راضی ہوں۔

پیری کے لائق وہ شخص ہے جو ضروری مسائل کا علم رکھتا مقاماتِ عشرہ مثل توکل و قناعت و زہد و صبر وغیرہ اسے حاصل ہوں، اربابِ دنیا سے اجتناب رکھتا ہو، مشائخِ کرام کے صحبت سے فیض یافتہ ہو، صاحبِ کشف یا صاحبِ ادراک ہو، خطرۂ ماسویٰ سے اس کا دل پاک ہو، ظاہر شریعت سے آراستہ اور باطن طریقت سے پیراستہ ہو۔

کھانے میں ایک رضائے نفس ہے اور ایک حق نفس، رضائے نفس غذا بہت لطیف اور حق نفس بہ مقدار توانائی ادائے فرض و سنت۔

صوفیہ دنیا و آخرت کو پسِ پشت ڈال کر متوجہ مولیٰ ہوتے ہیں۔