اے چارہ گر شوق کوئی ایسی دوا دے

اے چارہ گر شوق کوئی ایسی دوا دے

جو دل سے ہر اک غیر کی چاہت کو بھلا دے

بس دیکھ لیا دنیا کے رشتوں کا تماشا

مخلوق سے امید کے سب دیپ بجھا دے

پاکیزہ تمنائیں بھی لاتی ہیں اداسی

ہر ذوق طلب شوق تمنا ہی مٹا دے

اک میں ہوں فقط تو ہو اور عالم ہو ہو

اے حسن ازل سارے حجابات اٹھا دے

ہے روح کو ہر لمحہ تیرے وصل کی امید

آ زیست کی شب کو کبھی صبح بنا دے

کیوں نیک گمانوں کے سہارے پہ جئیں ہم

ان سارے فریبوں کو سرابوں کو ہٹا دے

دیکھے یا نہ دیکھے یہ تو محبوب کا حق ہے

نہ تو آہ و فغاں کر نہ تو غیروں سا گلہ دے

دے لذت دیدار کی مدہوشی میں وہ ہوش

جو ہستی کی تعریف و تعین کو گنوا دے

میں خود بھی کبھی ڈھونڈھ نہ پاؤں خود کو

یوں آتش سوزاں سے میری راکھ جلا دے

ہوں حسرت دید لیے تری دہلیز پہ کب سے

اک بار کرم کی نظر کر ہر اک پردہ اٹھا دے

کیوں ہوک سی اٹھتی ہے دل زار میں طاہرؔ

اس ہستئ ویراں کے خس و خاشاک جلا دے