wahi subh jis mein mujhko teri kuchh KHabar na aae

vahī sub.h jis meñ mujh ko terī kuchh ḳhabar na aa.e

mere daur-e-zindagī meñ kabhī vo sahar na aa.e

mirī chashm-e-justujū kī ye 'ajīb aarzū hai

ki kabhī vo sāmne ho kabhī vo nazar na aa.e

mujhe ġham nahīñ ḳhushī hai yahī dard-e-zindagī hai

merī chāra-sāziyoñ ko koī chāra-gar na aa.e

mere ġham kī kyā davā ho mujhe kis tarah shifā ho

merā zauq-e-dīd kyā jo tū hī nazar na aa.e

tere mai-kade kā ham ne ye 'ajīb taur dekhā

ki jo aa.e be-ḳhabar ho koī bā-ḳhabar na aa.e

merī pur-hijāb nazro zarā itnā dhyān rakhnā

ki vo sāmne bhī aa.e to tumheñ nazar na aa.e

nahīñ lutf bandagī kā nahīñ kaif zindagī kā

jo jabīñ ke paas khiñch kar tirā sañg-e-dar na aa.e

vo haram ki but-kada ho vo chaman ki mai-kada ho

vahāñ jā ke ham kareñ kyā jahāñ tū nazar na aa.e

merā haal kab zubūñ hai ye taḌap nahīñ sukūñ hai

mujhe chain yā ilāhī kabhī 'umr bhar na aa.e

wahi subh jis mein mujh ko teri kuchh KHabar na aae

mere daur-e-zindagi mein kabhi wo sahar na aae

meri chashm-e-justuju ki ye 'ajib aarzu hai

ki kabhi wo samne ho kabhi wo nazar na aae

mujhe gham nahin KHushi hai yahi dard-e-zindagi hai

meri chaara-saziyon ko koi chaara-gar na aae

mere gham ki kya dawa ho mujhe kis tarah shifa ho

mera zauq-e-did kya jo tu hi nazar na aae

tere mai-kade ka hum ne ye 'ajib taur dekha

ki jo aae be-KHabar ho koi ba-KHabar na aae

meri pur-hijab nazro zara itna dhyan rakhna

ki wo samne bhi aae to tumhein nazar na aae

nahin lutf bandagi ka nahin kaif zindagi ka

jo jabin ke pas khinch kar tera sang-e-dar na aae

wo haram ki but-kada ho wo chaman ki mai-kada ho

wahan ja ke hum karen kya jahan tu nazar na aae

mera haal kab zubun hai ye taDap nahin sukun hai

mujhe chain ya ilahi kabhi 'umr bhar na aae